السلام عليكم ورحمة الله وبركاته ، كثير سألوني عن كذا صورة صورتها فيها بوكيه عن انو ( ايش هذا – كيف سويتيه ) فحبيت افيد الكل بهالشرح المطول 🙂

Bokeh / البوكيه :
كلمة يابانية الأصل وتعني Blur ( مشوش – غير واضح – مطموس المعالم ) وهي باختصار المناطق الخارجة عن منطقة الفوكس في الصورة ، البوكيه عكس الـ sharpness  او الحدة لأن الحدة تحدث في المناطق اللي عليها الفوكس في أفضل حالاته بينما البوكيه يقع في خارج منطقة الفوكس تماما.

بعضهم يصنف البوكيه إلى نوعين :
1- هوليود ستايل بوكيه hollywood style bokeh
هذا الستايل اللي اغلبنا نعرفه او نشوفه وهو اللي تصير فيها مناطق الضوء اللي خارج منطقة التركيز عبارة عن دوائر غير واضح منها الا لونها تقريبا وهذا نقدر نحصله بوجود ضوء في الخلفية ومجرد عزله او تشتي الفوكس عنه ينتج لي بوكيه .. مثال انوار السيارات ، أنوار صناعية ، ضوء الشمس المنعكس او النافذ من خلال عناصر متداخلة ( مثل ورق الشجر ) مثل :

للمزيد : هنا
2- cream cheese bokeh
في هالنوع اقدر اقول انه العزل اللي نعرفه بشكله الطبيعي ، يعني لمن تكون الخلفية بشكل كامل معزولة عن الهدف وتنتج لنا تدرجات بحيث عناصر الخلفية تنمدج مع بعض وتصير  شيء واحد . مثل :

( طبعا نقدر نوصل لهالنوع من البوكيه بطريقة العزل العادية وهو كل ماقلت المسافة بين العنصر والعدسة مع فتحة عدسة اكبر كل ما حصلنا على خلفية معزولة عن العنصر ، وكل مابعدنا عن الهدف كل ماقل العزل والخلفية الضبابية .. وقوة العزل تختلف من عدسة لعدسة . )

كيف أقدر ألتقط صورة بوكيه ؟
العلاقة بين رقم العدسة و الـ DOF  ( عمق الميدان ) علاقة عكسية ، بمعنى كل ما كبر رقم العدسة كل ما قل عمق الميدان ، وكل ما صغر رقم العدسة كل ما كبر عمق الميدان ، و التصوير بعمق ميدان كبير يعطينا فرصة عزل أكبر وبالتالي فرصة لتواجد البوكيه بشكل أكبر .. مثال :

الصورة ع اليمين استخدمت عمق ميدان أصغر وزي ما انتوا شايفين قوة البوكيه اضعف منها ع اليسار ، الصورة اللي باليسار زدت العزل وبمعنى ثاني زدت فتحة العدسة ( قللت الرقم ) وبالتالي كبر عمق الميدان واعطاني منطقة عزل ممتازة وظهر البوكيه كمناطق ضوئية خارجة عن منطقة الفوكس ..

مثال ثاني :
في هذي الصورة أخذت عمق ميدان صغير وزي ماهو واضح بالصورة البوكيه ضعيف ويالله مبين ، في هذي الصورة زدت عمق الميدان وكانت الخلفية تساعد لان ورا الهدف نور الشمس ورا اوراق شجر .. في الصورة هذي تعمدت ازيد عمق الميدان والعزل لاكبر درجة أقدر عليها وزي ما انتو شايفين البوكيه في أفضل حالاته في الصورة الأخيرة ..

*

يعني نقدر نطلع بنتيجة انه عشان نحصل على بوكيه لازم تكون المنطقة خارجة عن الفوكس وبعمق ميدان كبير .. أو نقدر نتلاعب بالفوكس ومانضبطه صح وبهالطرقة نحصل على  بوكيه .  في ستايل هوليود : على حسب ضبط الفوكس وعمق الميدان ينتج لنا بوكيه ضعيف – جيد – ممتاز .. الضعيف لمن يكون الضوء متركز على حدود الدائرة ومو في النص ، يطلع شكلها حاد اكثر من المطلوب . الجيد او المتوسط : نحصل على دائرة ضبابية لكنها مو في أفضل حالاتها ، بمعنى ان الضوء متوزع بشكل متساوي تقريبا على الحدود والمنتصف . الممتاز : وهو اللي نسعى له لمن الحواف تكون مررره مو واضحة ومشوشة والضوء متركز بالوسط ومنتشر بشكل اضعف على الحواف

* استخدام الترايبود غير محبذ ، لأنه مايهمنا تركيز الصورة و حدتها بقدر مايهمنا قدر التشويش في الصورة.
* استخدام سرعة غالق بطيئة مرات تساعد في تكوين بوكيه ممتاز وبتوزيعات جميلة
* استخدام فتحة عدسة عدسة كبيرة ( رقم صغير ) مثلا 3.5 – 1.8
* بعضهم يحصر البوكيه في الدوائر فقط ويعتبر النوع الثاني شيء ماله علاقة بالبوكيه انما هو عزل عادي عن طريق عمق ميدان كبير .
* الناس بدت تبتكر في البوكيه لأن من جد نتائجه روعة ، فصار فيه بوكيه بأشكال قلوب و ورود و نجوم وهالشيء نقدر نحصل عليه بمثل هالطريقة
المشروحة في الفيديو . شخصيا ما جربتها بس ان شاء الله يكون لي تجربة قريبة .
* عدسة 18-55 تفي بالغرض لعمل بوكيه، لكن النتائج تكون اقوى وافضل بطبيعة الحال في العدسات اللي عندها قدرة عزل اقوى . في صوري اللي شرحت عليها استخدمت 18-55 و 24-70 mm من كانون طبعا ..
* استفدت من : هنا و هنا و هنا .

هذا الشرح جهد شخصي و نتيجة قراءة من المصادر اللي ذكرتهم ونتيجة تجربة .. يحتمل الخطأ ويحتمل الصواب ، أيضا من غير اللائق نقل الدرس بدون ذكر المصدر ..