How to make it 3 | كيف تصنع دفتر ؟

كيف أصنع دفتر يدوياً ؟

تقريبا من سنتين ونص خضت تجربة العمل الخاص، وبعت دفاتر عملتها يدويا في أحد البازارات. راح أنشر تجربتي قريب <- – بدري مره ترا :]
المهم بعدها صرت أتلقى طلبات من الناس القريبة ، ويعطوني اللي يبونه في الدفتر ، مثلا مقاسه وشكله و شكل الورق وأنا أحاول قد طاقتي وأسوي اللي أقدر. حبيت أشرح الخطوات البسيطة لعمل دفتر يدوي، بعض الناس تحب تعمل اشيائها بنفسها وكنوع من نشر الفائدة راح أنشر دفاتري وكيف أعملها وإيش الخامات اللي استخدمها. هالمرة راح أشرح طريقة دفتر مبسط وحجمه صغير، عملته قبل كم يوم عشان يكون مكان لأفكاري ، آخذه معاي وين ما أروح، أسجل فيه أفكاري وأهدافي الصغيرة والكبيرة، اللي ناوية أبداها واللي مو ناوية :].

بسم الله نبدأ.

الخامات والأدوات :
#ورق كرتون ( أي كرتون في البيت ، كرتون بيبسي – مناديل أي شيء يمشي حاله )
#أوراق تغليف ( بعضها كنت مشتريتها وبعضها بقايا اوراق من هدايا :] )
#أي شيء تفضلونه للتزيين سواء شرائط او أزرار. كله يرجع لذوقكم.
#مقص – صمغ.

أولا:
أقص الكرتونة بحسب المقاس اللي أبي. مرات أكتفي بقصها ،( ومرات أنزع الطبقة اللي فوقها عشان تظهر خطوط الكرتون، وتعطي شكل جميل ).

ثانيا:
أبدأ مرحلة تزيين الكرتونة بأي شكل أنا حابته. في هالدفتر اخترت أزينه بأوراق تغليف بطريقة عشوائية وبألوان مختلفة. أول شي لصقت القطعة اللي فيها ورود بنفسجية، وفوقها لصقت القطع الثانية زي ما هو موضح بالصور:

بعد ماخلصت مغطية الكرتونة بورق التغليف، حبيت أضيف شي زيادة من شيء أحبه. شخصيا أحب الريبونز المنقطة، فاخترت هاللون وقررت أحطه في أحد الزوايا:

* كانت فكرتي بهالطريقة ، انو زي ما يحطون ريبون أسود على صور الأشخاص المتوفين، أنا احط ريبون بلون مليان نشاط وبشيء أحبه، أبي أعبر عن الدفتر بطريقة أنو يحمل حياتي وأفكار حياتي، وتجاربي البسيطة وأهدافي المعلنة وغير المعلنة.. ببساطة دفتر الحياة.

الحين بعد ماخلصت تماما الغلاف، بقى الورق الداخلي + السلك. شخصيا أفضل السلك لأنو مرات جربت أخرم الكرتون مع الورق واربطهم بشريطة، بس طلعت الفكرة غير عملية خصوصا لدفتر راح أستخدمه كثير. فصرت أسويه سلك. أخذت ورق أبيض A4 لانه مو مسطر ، ما أبي أي سطور ! أبي ورقة ( بيضاء حرة ) وقصيته على نفس حجم الغلاف، وأخذته المكتبة وطلبت منه يسوي له سلك . :] والنتيجة :

بإمكان أي احد يصنع الأجمل إذا استخدمنا خيالنا وأفكارنا البسيطة. الأشياء اللي من صنع يدنا ونتيجة لأفكارنا راح يكون لها معزة خاصة عندنا حتى لو تطورت مهاراتنا. راح تبقى تحمل معاها ذكريات اليوم اللي عملت فيه هالشيء، وراح تظل تحمل معاني كبيرة داخلك. جربوا تصنعون ولو حاجة وحدة بس بيدكم وبجهدكم. توفير مال واستثمار جهد و وقت ومتعة في حاجة ترافقك طويلا : ) .