الآية السادسة.

* السلام عليكم ورحمة الله اعتذر عن التأخير اصدقائي.. لكن انا حاسة بمسؤلية كبيرة تجاه كلام الله! اخاف اكتب كلام اضل فيه نفسي واضل غيري! اللهم اني اعوذ بك ان اضل او اضل.. فعشان كذا انا ما انشر بسرعة احسني احتاج اراجعه مع نفسي عشان ما اكون تسرعت! وسامحني يارب لو فيه خطأ.. وسامحوني لو فيه خطأ! وماعندي مشكلة اطلاقا نبهوني لو اخطأت في التدبر..

مو جمعة عن جمعة ! لا يوم عن يوم استوعب اكثر ليه الرسول عليه الصلاة والسلام وصانا نقرا الكهف بشكل اسبوعي.. وليه هالسورة بالذات هي نور لنا بين الجمعتين! سبحان الله سبحان الله ! دايمن لمن اقرا هالآية احس فيه شيء مافهمته تماما! يعني قرأت تفسير هالآية واقوال المفسرين وفهمت الحمد لله لكني مازلت اشوف فيها شي ماعرفته بعدني! يعني ليه واتبع سببا جات بعد ما قال الله تعالى: انا مكنا له في الارض…. بعدين في هالاية بالذات اللي فيها عن تمكين ذي القرنين في الارض تجي الاية واتبع سببا.. لازلت اقول قرأت اراء المفسرين وساعدتني افهم لكني زي ماقلت احس فيه شي بتقوله هالآية وانا مو مركزة.. بعد تمعن حسيت اني فهمتها ! او خ نقول حسيت صلتها المباشرة بحياتنا.. لاحظوا الآية بدت بتمكين الله من كل شي للانسان العظيم ذي القرنين.. بعدين في آية مستقلة: فأتبع سببا.. يعني الله اعطاه من كل الاسباب اللي تعينه على قيادة الارض والاصلاح فيها هذاك الوقت بعدين (ف) (حرف عطف) اتبع سببا.. يعني واضح انه هالاية مرتبطه بتمكين الله لذي القرنين.. فاللي استوعبته انو الله عز وجل اعطى ذي القرنين كل شي من اسباب القوة والعلم والمال والقيادة والايمان.. بس ؟ خلاص ؟ لا! ذو القرنين اتبع سببا! يعني ذو القرنين كان مستوعب انه عشان تكون شخص عظيم ماتجلس وتكف يدينك وتكتفي باللي عندك وتقول هذا اللي عندي! لا لازم انت تشتغل ولازم انت تشوف الاسباب ولازم تشق الطرق وتستثمر اللي عندك. مع انه الله اعطى ذي القرنين كل شيييي لكنه ما استكان بل : اتبع سببا! اعطاه الله مفاتيح العلوم والقوة المادية والعسكرية يمكن ما انعطيت لاحد في هذاك الوقت ! والقوة الثانية هو تطوير ذي القرنين لنفسه !

يالله يالله! سبحانك يارب ! القرآن فيه دروس تطوير الذات وهالآية لو فهمتها صح – ان شاء الله – فهي اكبر مثال واضح.. كم مره نقرا بكتب تطوير الذات عن انه لازم الواحد منا يتحرك ولازم يطور نفسه وانه مايعتمد على ذكائه لانه الذكاء لحاله مايكفي ! او الوسائل لحالها ماتكفي لازم تبرهن قدرتك الكافية على استخدام الوسائل هذي.. كم مره قرينا انه المنجزات العظيمة ١٪ الهام او ذكاء و ٩٩٪ عمل وجهد! يالله شوفوا بالقرآن كيف اختصر كل هالشي بجملة وحدة في سطر واحد! سبحانك يارب! ياللإعجاز..

استوعبتوا اللي استوعبته !! كيف تطور نفسك ؟ كل الجواب بهالآية ! اشتغل – اعمل- دور اسبابك – لا تتواكل ! لو عندك مواهب استثمرها وطورها بدورك! – لو عندك عقل ذكي علميا مايكفي انه يكون ذكي وبس لا مرنه اكثر واشتغل عليه اكثر! بكذا بتكون شخص عظيم ايجابي! متخيلين سر تطورنا انه احنا نعمل ونكدح ونبذل اسبابنا وما نتواكل.. وانه احنا مهما كانت عندنا امكانيات وهبات ومواهب ماتكفي الا لازم لمن انت تشتغل على نفسك وتطور هالاشياء اللي عندك ! رزقك مكتوب لك صحيح ! لكن روح اسعى له لاتقعد وتنتظر .. لاانت روح وفتش.. ابحث عن الفرص.. ماتتكتف وتقنن طموحك! لا انت الحين ( اتبع سببا ). والا ليه ذو القرنين مع كل التمكين اللي اعطاه ياه ربي ما جلس ؟ لا بالعكس هو كان مستغل هالامكانيات ومستخدمها صح! ومطورها صح! السماء لاتمطر ذهبا،، دورنا الحين ( نتبع سببا ).